«Քաղաքային կանաչ լուսավորություն» ՄԱԶԾ-ԳԷՖ ծրագիրը ՀՀ բնապահպանության նախարարության և Երևանի քաղաքապետարանի հետ համատեղ հոկտեմբերի 23-27-ը կազմակերպում է «Երևանի կանաչ լուսավորության շաբաթ» խորագրով արշավ, որի նպատակն է բարձրացնել հանրության իրազեկությունն էներգախնայող և բնությանը քիչ վնաս հասցնող լուսավորության լուծումների վերաբերյալ: Արշավը համահունչ է ՄԱԿ-ի կայուն զարգացման 7-րդ (Մատչելի և մաքուր էներգիա) և 13-րդ (Գործողություն՝ ի նպաստ կլիմայի) նպատակներին: Շաբաթվա ընթացքում քաղաքացիները հնարավորություն կունենան մասնակցելու էներգախնայող LED տեխնոլոգիային առնչվող մի շարք կրթական և զվարճալի միջոցառումների:

դիտել հոլովակը                                                          ներբեռնել գրքույկը

Ի՞նչ է LED լուսավորությունը

Լուսադիոդային (LED – Light Emitting Diode) լուսավորությունը Հայաստանում տեխնոլոգիական զարգացման հրաշալի օրինակ է: Ճանապարհների ու փողոցների LED լուսավորության շնորհիվ գիշերային երթևեկությունն ավելի անվտանգ է, իսկ

երեկոյան զբոսանքը՝ ավելի հաճելի: LED-ն օգտագործում է 8 անգամ ավելի քիչ էներգիա, 8 անգամ նվազեցնում է ջերմոցային գազերի արտանետումներն ու դարձնում շրջակա միջավայրը բարենպաստ ու հաճելի: Այսօր Գլոբալ էկոլոգիական ֆոնդի (GEF) ֆինանսավորման, ՄԱԿ-ի Զարգացման ծրագրի (UNDP) և ՀՀ բնապահպանության նախարարության համագործակցության շնորհիվ մենք այդ առավելությունները գնահատելու հնարավորություն ունենք:

Երևանի բնակիչներն ու հյուրերն արդեն իսկ վայելում են օդանավակայան տանող ճանապարհի, ինչպես նաև Մաշտոցի և Արշակունյաց պողոտաների, Ծիծեռակաբերդի և Աթենքի փողոցների լուսադիոդային լուսավորությունը: 2015 թ. մարտից շուրջ 1300 LED լուսատուների շնորհիվ քաղաքի այդ հատվածները բոլորվին նոր լույսի ներքո են ներկայանում: Երևանի կենդանաբանական այգին ևս շողում է 160 նոր LED լամպերի լույսով: Միայն այս 5 կետերում իրականացված փոփոխությունը տարեկան ավելի քան 500 տոննայով կրճատում է ջերմոցային գազերի արտանետումը, ինչի շնորհիվ LED-ի կիրառությունը ոչ միայն գեղեցիկ է, այլև հրաշալի շրջակա միջավայրի պահպանության համար: 

Բնապահպանությունը միակ առավելությունը չէ. էներգախնայող գերարդյունավետ LED տեխնոլոգիան նաև մեծապես կրճատում է Երևանի քաղաքապետարանի էլեկտրաէներգիայի ծախսը` տարեկան ընդամենը հինգ փողոցից ապահովելով 115,000 դոլարի խնայողություն:

Ինչպես կարող է LED լուսավորությունը փոխել ՔՈ աշխարհը

Լուսադիոդային լուսավորությունը մեծ դերակատարություն ունի հանրային տարածքներում: Սակայն այդ առավելությունները. դու կարող ես գնահատել նաև եթե  նույն տեխնոլոգիան կիրառես նաև տանը: Պարզապես փոխարինի՛ր քո տան սովորական շիկացման լամպերը LED տարբերակով: Թեպետ դրանք ավելի թանկ արժեն, սակայն առավելությունները շատ գրավիչ են. LED լամպերը մինչև 50 անգամ ավելի երկար են գործածվում, ծախսում են 8 անգամ ավելի քիչ էներգիա և շատ ավելի ոճային տեսք ունեն: Այսպիսով՝ դու կարող ես վայելել քո տան վերափոխումը, խնայել գումար և բարի գտնվել շրջակա միջավայրի նկատմամբ՝ գալիք երկար տարիների ընթացքում ամեն անգամ միացնելով լույսը:

Ինչպես մասնակցել «Երևանի կանաչ լուսավորության շաբաթ» արշավին

Լուսադիոդային էներգախնայող լուսավորության առավելությունները ներկայացնելու  նպատակով հոկտեմբերի 23-27–ը կկայանա «Երևանի կանաչ լուսավորության շաբաթ» խորագրով ուրախ միջոցառումների ծրագիրը:

Միացիր լամպերի փոխանակմանը և շահիր նվերներ

«Երևանի անաչ լուսավորության շաբաթվա» ընթացքում Երևանի տարածքում կգտնես հատուկ տաղավարներ, որտեղ կարող ես փոխանակել քո տան ավանդական շիկացման լամպը LED լամպով: Անվճար LED լամպից բացի՝ դու կարող ես նաև շահել փոքրիկ անակնկալ-նվեր՝ վարդ, գինի, սուրճ, շոկոլադ, թանգարանի տոմսեր: Այսպիսով՝  կարող ես սիրելիիդ հաճելի անակնկալ մատուցել կամ այն ինքդ վայելել:

Տաղավարները աշխատելու են երկուշաբթիից ուրբաթ 12:00–20:00 հետևյալ հասցներում (քարտեզը տես ստորև)

Հոկտեմբերի 23, 24, 25

► Հյուսիսային պողոտա, շատրվանների հարևանությամբ

► «Երիտասարդական» մետրո կայարանի հարևանությամբ

Հոկտեմբերի 26, 27

► Գարեգին Նժդեհի հրապարակ, «Ամերիաբանկի» հարևանությամբ

► Նոր Նորքի 2–րդ զանգված, շուկայի հարևանությամբ
 

Բացահայտիր ավելին՝ Պեչա-Կուչա երեկոյի ընթացքում

Միացիր և բացահայտիր, թե ինչ ունեն պատմելու մեր առաջատար մասնագետները քաղաքի կանաչ զարգացման և բարենպաստ շրջակա միջավայրի մասին:  Հանդիպում ենք Պեչա-Կուչայի (PechaKucha) ձևաչափով։ Եթե անգամ մինչ օրս չես լսել Պեչա-Կուչայի մասին, համոզված ենք, որ կհավանես այն:

Ձևավորվելով Ճապոնիայում՝ այն բառացիորեն նշանակում է ճեպազրույց։ Սա պրեզենտացիայի ձևաչափ է՝ բաղկացած 20 պատկերներից, որոնցից յուրաքանչյուրը մեկնաբանվում է 20 վայրկյանում: Այն արագընթաց է ու զվարճալի, օգնում է խուսափել «թեժ բախումներից», քանի որ բանախոսներից յուրաքանչյուրն իր մտքերն արտահայտելու համար 7 րոպեից էլ քիչ ժամանակ ունի:

Համեցե´ք Հայկական Բարեգործական Ընդհանուր Միության հայաստանյան գրասենյակ (Երևան, Մելիք-Ադամյան փող., 2/2 շենք) ուրբաթ օրը՝ հոկտեմբերի 27-ին, ժամը 19:00-ին: Մուտքը ազատ է։

սեղմեք պատկերներին՝ կարդալու համար