Ապրիլի 12-ին Արտաշատում տեղի ունեցավ Արարատյան ջրավազանային կառավարման պլանի վերանայման աշխատանքների հանրային քննարկումը: Աշխատանքներն իրականացվել էին «Հարմարվողականության ազգային ծրագիր Հայաստանում» (ՀԱԾ) ՄԱԶԾ-ԿԿՀ ծրագրի ներքո՝ Հայաստանի Հանրապետության Հարավային և Արարատյան ջրավազանների համար Ջրավազանային կառավարման պլանների վերանայման խորհրդատվական ծառայությունների շրջանակում` «Գեոինֆո» ՍՊԸ-ի կողմից:
Աշխատաժողովի նպատակն էր Արարտյան ջրավազանային կառավարման տարածքի շահագրգիռ կողմերին ներկայացնել ջրավազանային կառավարման պլանի վերանայված և ավելացված բաժինները, ինչպես նաև կազմակերպել կատարված աշխատանքների արդյունքների և առկա խնդիրների հանրային քննարկում:
Միջոցառմանը բացման խոսքով հանդես եկան ՀՀ շրջակա միջավայրի նախարարության Արարատյան ջրավազանային կառավարման տարածքային բաժնի պետ Խաչիկ Հարությունյանը և ՄԱԶԾ հայաստանյան գրասենյակի Կլիմայի, շրջակա միջավայրի, կայունության թիմի ղեկավար Հովհաննես Ղազարյանը:
«Արարատյան ջրավազանային կառավարման պլանի վերանայման անհրաժեշտությունն առաջացել է 2016-2021 թթ.-ի համար մշակված պլանի ժամանակահատվածի ավարտի հետ կապված: Շրջակա միջավայրի նախարարության նախաձեռնությամբ, ՄԱԶԾ ֆինանսավորմամբ մշակվել է 2022-2027թթ.-ի համար նոր Արարատյան ջրավազանային կառավարման պլան: Աշխատանքների ընթացքում վերանայվել են հիմնականում օգտագործելի ջրային ռեսուրսի ծավալները, ազգային և ստրատեգիական նշանակություն ունեցող ջրի ծավալները, ինչպես նաև թարմացվել են ջրառաջարկի և ջրապահանջարկի կանխատեսվող տվյալները», - նշեց Խաչիկ Հարությունյանը:
Հովհաննես Ղազարյանն իր ելույթում ընդգծեց հատկապես կլիմայի փոփոխության համատեքստում ջրային ռեսուրսների հասանելիության ապահովմանն ուղղված հավելյալ միջոցառումների և գործողությունների կարևորությունը:
«Հայտնի է, որ ջրավազանային կառավարման պլանների մշակումը ՀՀ ջրային օրենսգրքի պարտադիր պահանջ է, որի նպատակն է բարելավել ջրային ռեսուրսների կառավարման և ջրօգտագործման արդյունավետությունը` հաշվի առնելով նաև կլիմայի փոփոխության ակնկալվող ազդեցությունը: Որպես արդյունավետ պլանավորման գործիք՝ ջրավազանային կառավարման պլանները սահմանում են բնապահպանական նպատակներ, ինչպես նաև դրանց հասնելուն ուղղված գործողությունների առաջնահերթություններ։ Սա անհրաժեշտ է ջրային ռեսուրսների արդյունավետ և կայուն ջրօգտագործման, ինչպես նաև ջրօգտագործողների հավասարակշռման համար՝ այդ թվում գյուղատնտեսություն, ձկնաբուծություն, արդյունաբերություն, էներգետիկայի և այլն»,- հավելեց Հովհաննես Ղազարյանը:
Արարատյան ջրավազանային կառավարման պլանի վերանայված և ավելացված գլուխների ու բաժինների տվյալները և տեղեկատվությունը կաջակցեն ջրային ռեսուրսների կառավարման համար պատասխանատու մարմիններին, վարչական մարմիններին և հանրությանը՝ ջրային ռեսուրսների ոլորտում որոշումների կայացման և դրանց ռացիոնալ և արդյունավետ օգտագործման հարցում:
Աշխատաժողովին ներկա գտնվեց և առցանց մասնակցեց ոլորտի 40 շահառու, այդ թվում` Շրջակա միջավայրի նախարարության, Արարատի մարզպետարանի, «Հիդրոօդերեևութաբանության և մոնիթորինգի կենտրոն» ՊՈԱԿ-ի, «Խոսրովի անտառ պետական արգելոց» ՊՈԱԿ-ի, և ՄԱԶԾ ներկայացուցիչներ:
Ավելի վաղ՝ մարտի 10-ին «Հարմարվողականության ազգային ծրագիր Հայաստանում» ՄԱԶԾ-ԿԿՀ ծրագրի ներքո, արդեն կայացել է Հարավային ջրավազանային կառավարման պլանի վերանայման աշխատանքների հանրային քննարկում, որի ընթացքում Հարավային ջրավազանային կառավարման տարածքի շահագրգիռ կողմերին ներկայացվել են ջրավազանային կառավարման պլանի վերանայված և ավելացված բաժինները և կատարված աշխատանքների արդյունքները:
Միջոցառման օրակարգը
Ներկայացված նյութերը
ՋԿՊ-ի վերանայված բաժինները
