Հայ
Սեպտեմբերի 30-ին «Փարիզի համաձայնագրի ներքո Հայաստանի թափանցիկության ազգային շրջանակի կառուցում» ՄԱԶԾ-ԳԷՀ ծրագրի շրջանակում կայացավ «Մեղմման քաղաքականությունների և գործողությունների չափման, հաշվետվողականության և հավաստագրման (ՉՀՀ) համակարգի կարգավորումներ» խորագրով աշխատաժողովը:
Աշխատաժողովը նախատեսված էր «Կլիմայի փոփոխության մասին» շրջանակային կոնվենցիայի և Փարիզյան համաձայնագրի պահանջների ու դրույթների կատարման միջգերատեսչական համակարգման խորհրդի և աշխատանքային խմբերի անդամների, պետական շահագրգիռ կողմերի և փորձագիտական համայնքի համար: Այն նպատակ ուներ ներկայացնել և շահառուների հետ քննարկել մեղմման քաղաքականությունների և գործողությունների ՉՀՀ համակարգը, դրա իրականացման միջազգային լավագույն փորձը, Հայաստանում առկա բացերը, մարտահրավերներն ու հնարավոր լուծումները:
Աշխատաժողովի մասնակիցներին ողջունելիս ՄԱԶԾ Կլիմայի փոփոխության ծրագրերի համակարգող Դիանա Հարությունյանը նշեց, որ որպես ՄԱԿ-ի Կլիմայի փոփոխության շրջանակային կոնվենցիան և Փարիզի համաձայնագիրը ստորագրած երկիր՝ Հայաստանը պարտավոր է իրականացնել Թափանցիկության ընդլայնված շրջանակի դրույթները, ինչի համար անհրաժեշտ է տվյալների շարունակական հավաքագրում, մոնիթորինգ, ստուգում և հաշվետվողականություն: Նա ընդգծեց նաև ներկա մասնագետների ակտիվ մասնակցության կարևորությունը Հայաստանում ՉՀՀ արդյունավետ և համապարփակ համակարգի և համապատասխան գործընթացների նախագծման հարցում:
Աշխատաժողովի ընթացքում մասնակիցները հնարավորություն ունեցան նաև ծանոթանալ ծրագրի կողմից ներգրավված «Գաուս» միջազգային կազմակերպության կողմից մշակված մեղմման ՉՀՀ-ի տվյալների նկատմամբ պահանջներին և տեղեկատվության հավաքագրման մեթոդաբանությանը և խմբային աշխատանքների շուրջ անդրադառնալ ու քննարկել տվյալների հավաքագրման գործընթացում ներգրավված կառույցների ցանկը, դրանց պատասխանատվությունների շրջանակը, հավաքագրված մեղմման քաղաքականությունների ու գործողությունների ցանկը և կարգավորման մոտեցումները:
Միջոցառմանը ներկա գտնվեց և առցանց մասնակցեցին Շրջակա միջավայրի, Տարածքային կառավարման և ենթակառուցվածքների, Էկոնոմիկայի նախարարությունների, «Հիդրոօդերևութաբանության և մոնիթորինգի կենտրոն» ՊՈԱԿ-ի, «Բնապահպանական ծրագրերի իրականացման գրասենյակ» ՊՀ-ի, Երևանի քաղաքապետարանի, Վիճակագրական կոմիտեի, Քաղաքաշինության կոմիտեի, Հանրային ծառայությունները կարգավորող հանձնաժողովի, միջազգային կազմակերպությունների և ՄԱԶԾ ավելի քան 45 ներկայացուցիչ:
