Հայ
Ապրիլի 22-ին Տավուշի մարզ կատարած այցի ընթացքում ներկայացվեցին «ՄԱԿ ԿՓՇԿ ներքո Հայաստանի չորրորդ ազգային հաղորդագրության և երկամյա առաջընթացի երկրորդ զեկույցի պատրաստում» ՄԱԶԾ-ԳԷՖ ծրագրի արդյունքները և «Հարմարվողականության ազգային ծրագիր` Հայաստանում միջնաժամկետ և երկարաժամկետ հարմարվողականության պլանավորման առաջխաղացման համար» ՄԱԶԾ-ԿԿՀ ծրագրի մարզային հարմարվողականության պլանավորման գործընթացի մանրամասները։
ՄԱԶԾ և ՀՀ շրջակա միջավայրի նախարարության փոխձագետները մարզի տարածքային կառավարման գերատեսչությունների ներկայացուցիչների հետ քննարկեցին մարզում իրագործվող կլիմայի փոփոխության ազգային քաղաքականությունն ու ծրագրերը, առկա մարտահրավերներն ու զարգացման հնարավորությունները:
Ներկայացվեցին նաև կլիմայի փոփոխության ուղղությամբ ՀՀ միջազգային պարտավորությունները, ՄԱԿ ԿՓՇԿ ներքո Հայաստանի 4-րդ ազգային հաղորդագրության արդյունքները՝ կարևորելով մարզի ցածր ածխածնային զարգացման հեռանկարները։ Առանձնակի ուշադրության արժանացան Տավուշի մարզում դիտարկված և կանխատեսվող կլիմայական ռիսկերը, կլիմայի փոփոխության հետևանքների նկատմամբ հիմնական խոցելի ոլորտները, բնական ռեսուրսների, ենթակառուցվածքների, ինչպես նաև՝ մարդու առողջության խոցելիության գնահատման արդյունքները, կլիմայի փոփոխության հետևանքների նկատմամբ հարմարվողականության հնարավոր միջոցառումերը և մարզային զարգացման պլաններում կլիմայի փոփոխության ներառման կարևորությունը:
Քննարկվեց նաև Տավուշի մարզային հարմարվողականության պլանի մշակման գործընթացը, մասնավորապես՝ ՄԱԶԾ-ԿԿՀ ՀԱԾ ծրագրի շրջանակում նախատեսված աջակցության շրջանակն ու ընտրված մասնագիտական ընկերության կողմից նախատեսվող աշխատանքային գործընթացի մանրամասներն ու գործողությունների պլանը:
Կլիմայի փոփոխության հարցերի իրազեկման բարձրացման նպատակով անցկացվեց հանդիպում մարզի ուսուցիչների հետ, որի ընթացքում ներկայացվեց «Կլիմայի փոփոխության կրթության և իրազեկման՝ Կլիմայական արկղիկ» տարածաշրջանային ծրագրի շրջանակներում պատրաստված նորարարական, ինտերակտիվ ուսումնական գործիքակազմը` «Կլիմայական արկղիկ» ձեռնարկը, որն ուսուցիչներին հնարավորություն է ընձեռում առավել համապարփակ ներկայացնել կլիմայի փոփոխությանը և կլիմայի փոփոխության հարմարվողականությանն առնչվող հարցերը՝ նպաստելով դրանց վերաբերյալ դպրոցականների գիտելիքների և հետաքրքրության բարձրացմանը:
Աշխատաժողովի ընթացքում ներկայացված նյութերը հասանելի են այստեղ:
