Հայ
Այսօր ՄԱԶԾ Կլիմայական խոստում ծրագրի շրջանակներում տեղի ունեցավ «Երկարաժամկետ ցածր արտանետումներով զարգացման ռազմավարություն (ԵԺ-ՑԱԶՌ). իրականացման տնտեսական, սոցիալական և բնապահպանական ազդեցությունները» աշխատաժողովը:
Միջոցառումը համախմբել էր մասնակիցներ պետական գերատեսչություններից, մասնավորապես՝ Շրջակա միջավայրի, Տարածքային կառավարման և ենթակառուցվածքների, Էկոնոմիկայի նախարարություններից, ՀՀ Վիճակագրական կոմիտեից, հասարակական կազմակերպություններից, ՄԱԶԾ գրասենյակից: Ուսումնասիրությունն իրականացվել է Avenue խորհրդատվական ընկերության կողմից:
Աշխատաժողովի հիմնականն նպատակն էր ներկայացնել ԵԺ-ՑԱԶՌ ներդրման սոցիալ-տնտեսական և բնապահպանական ազդեցությունների գնահատման արդյունքները, այդ թվում՝ ստացված համապատասխան էկոնոմետրիկ մոդելի կառուցման միջոցով։
ՄԱԶԾ Կլիմայական խոստում ծրագրի ղեկավար Արտակ Բաղդասարյանն իր մեկնարկային ելույթում ընդգծեց աշխատանքի կարևորությունը՝ նշելով.
«Քաղաքականությունների մշակումից զատ կարևոր է նաև դրանց էֆֆեկտիվ իրականացումը, և ՄԱԶԾ-ն փորձելու է վերլուծական հենք ապահովել ԵԺ-ՑԱԶՌ իրականացման ընթացքում որոշումների կայացման համար: Ուստի մինչև 2050 թվականը նման հետազոտությունների կարիքը շարունակաբար պահանջված կլինի»:
Սա առաջին արդյունքն է, որով գնահատվել է թե ռազմավարության մեջ ընդգրկված միջոցառումները ինչ ազդեցություններ են ենթադրում սոցիալական, տնտեսական և բնապահպանական տեսանկյունից: Կիրառվել է էկոնոմետրիկ մոդել, որը միանգամյա չէ և հետագայում կծառայի նոր վերլուծությունների համար, միաժամանակ զարգացվելով, փոփոխվելով և կատարելագործվելով:
Avenue Խորհրդատվական ընկերության տնօրեն Կարեն Մարտիրոսյանը հակիրճ ներկայացրեց աշխատանքի թեմատիկ բովանդակությունը՝ շնորհակալություն հայտնելով ՄԱԶԾ թիմին արդյունավետ համագործակցության և օգտակար քննարկումների համար:
Վռամ Թևոսյանը (փորձագիտական թիմի ղեկավար) և Ալեքսանդր Գրիգորյանը (փորձագետ) ներկայացրին գնահատման արդյունքները մասնավորապես էներգետիկայի, տրանսպորտի, շենքերի էներգախնայողության և էներգաարդյունավետության, արդյունաբերական գործընթացների, գյուղատնտեսության, անտառային տնտեսության, թափոնների կառավարման ոլորտների մասով: Ներկայացվեց նաև գնահատման համար օգտագործված էկոնոմետրիկ մոդելը, մասնավորապես՝ դրա կառուցվածքը, ընտրված փոփոխականները, ազդեցության խողովակները, ինչպես նաև՝ հիմնական եզրահանգումները:
Հանդիպման մասնակիցների միջև ծավալվեց ակտիվ քննարկում, կարծիքներ փոխանակվեցին էկոնոմետրիկ գործիքի հետագա կիրառման նպատակով:
ՄԱԶԾ Կլիմայական ծրագրերի պատասխանատու Դիանա հարությունյանը բարձր գնահատեց աշխատանքի արդյունքները և հույս հայտնեց ԵԺ ՑԱԶՌ-ի արդյունավետ իրականացման վերաբերյալ:
«Կլիմայական խոստում Հայաստան. խոստումից ազդեցություն» ծրագիրը նպատակ ունի լրացնելու վերանայված ԱՍԳ-ի թիրախները շոշափելի գործողությունների վերածելու հարցում առկա բացը, որը կհանգեցնի երկարաժամկետ ցածր արտանետումներով և կլիմայի փոփոխության նկատմամբ դիմակայուն զարգացման: Այն ամուր հիմք կստեղծի վերանայված 2021-2030թթ. ԱՍԳ-ի ներքո սահմանված նպատակների մշակման և իրականացման համար և օգտակար կլինի հաջորդ ԱՍԳ մշակման համար: Ծրագրի ընդհանուր նպատակն է աջակցել երկրին իր խոստումը վերածել գործողությունների հանուն կլիմայի փոփոխության նկատմամբ դիմակայուն և կայուն զարգացման՝ նպաստելով կլիմայի փոփոխության մեղմմանը, ցածր արտանետումներով և կլիմայի փոփոխության նկատմամբ դիմակայուն տնտեսության զարգացմանը՝ Փարիզյան համաձայնագրի ներքո:
