Հայ
Նոյեմբերի 18-19 Ծաղկաձորում տեղի ունեցավ ՀՀ աշխատանքի և սոցիալական հարցերի նախարարության և ՄԱԶԾ Կլիմայի փոփոխության ծրագրերի կազմակերպած «ՀՀ-ում կլիմայի փոփոխության ազդեցության մեղմման գործողություններում գենդերային հիմնախնդիրներն ու դրանց հնարավոր լուծումները» թեմայով խորհրդաժողովը:
Խորհրդաժողովի նպատակն էր վերհանել կլիմայի փոփոխության համատեքստում առկա կանանց և սոցիալապես խոցելի խմբերին վերաբերող հիմնախնդիրները և ներկայացնել դրանց լուծմանն ուղղված հնարավոր միջոցառումները:
ՀՀ աշխատանքի և սոցիալական հարցերի փոխնախարար Տաթևիկ Ստեփանյանն իր ելույթում նշեց, որ գենդերային գործող ռազմավարությունում ներառված չէ կլիմայի փոփոխության գենդերային ազդեցության վերաբերյալ որևէ միջոցառում, քանի որ նախկինում այս համատեքստում գենդերային և սոցիալական խոցելիության յուրահատուկ դրսևորումներն ազգային, մարզային, համայնքային մակարդակներում քննարկման առարկա չեն հանդիսացել:
«Այս երկօրյա հանդիպման հիմնական նպատակն է՝ հասկանալ կլիմայի փոփոխության ազդեցությամբ պայմանավորված գենդերային հիմնախնդիրները, դրանց լուծմանն ուղղված առաջարկություններն ու դրանցից բխող անհրաժեշտ միջոցառումները, որոնք հետագա միջգերատեսչական և աշխատանքային խմբերում քննարկումների արդյունքում կամփոփվեն և կամ կդառնան որևէ իրավական ակտ, կամ մեր ընթացիկ աշխատանքներում այս ուղղությամբ կլինեն ավելի ուղղորդող՝ այսպիսով մեր բոլոր գործողություններն ավելի համակարգված դարձնելով», - ասաց փոխնախարար Ստեփանյանը՝ կարևորելով ՄԱԶԾ Կլիմայի փոփոխության ծրագրերի շրջանակում իրականացված ուսումնասիրություններում վեր հանված գենդերային և սոցիալական խնդիրները, դրանցից բխող եզրահանգումներն ու առաջարկությունները, ինչպես նաև ոլորտի շահեկից կառույցների, հատկապես՝ Կանանց հարցերով խորհրդին կից աշխատանքային խմբի անդամների գիտելիքի խորացումը վերոգրյալի շուրջ:
ՀՀ շրջակա միջավայրի փոխնախարար Աննա Մազմանյանն իր ելույթում կարևորեց քաղաքականությունների մշակման գործընթացներում և համայնքային կյանքում կանանց ներգրավվածությունն ու լիարժեք մասնակցությունը՝ հատկապես կլիմայի փոփոխության համատեքստում:
«Կլիմայի փոփոխության համատեքստում գենդերային հարցն այժմ ուշադրության կենտրոնում է ամբողջ աշխարհում: Հայաստանն այս ոլորտում դեռևս շատ անելիք ունի: Առաջնահերթ, իհարկե, շատ կարևոր է, որ մենք ավելի ակտիվ ներգրավվածություն ունենանք միջազգային հարթակներում՝ հատկապես նկատի ունենալով, որ մենք ունենք այդ ներուժը, ունենք մասնագետներ, որոնք կարող են ներգրավված լինել այդ գործընթացներում: Բացի այդ, շատ կարևոր է նաև, որ մենք հստակ հասկանանք կարճաժամկետ, միջնաժամկետ և երկարաժամկետ հատվածներում մեր անելիքներն ու ակնկալվող արդյունքները: Որքան ավելի հստակ վեր հանենք առկա խնդիրները, մշակենք ձևաչափ այդ խնդիրների լուծման համար, այնքան ավելի արդյունավետ կլինի մեր աշխատանքը: Անձամբ պատրաստ եմ լիարժեք լինել ներգրավված համապատասխան գործընթացներում», - նշեց փոխնախարար Մազմանյանը՝ ավելացնելով որ Շրջակա միջավայրի նախարարությունը ևս պատրաստ է աջակցել, մասնակցել ավելի նեղ կազմով նշված հարցերի շուրջ տեխնիկական հանդիպումների ու քննարկումների:
ՀՀ էկոնոմիկայի փոխնախարար Անի Իսպիրյանը ևս կարևորեց խորհրդաժողովում քննարկվող թեմաները՝ նշելով, որ էկոնոմիկայի նախարարությունը նույնպես գործողություններ է ձեռնարկում ոլորտում խրախուսելու կանանց դերակատարությունն ու գործունեությունը, մասնավորապես փոքր և միջին ձեռնարկատիրություների զարգացմանը միտված իր միջոցառումներում:
ՄԱԶԾ Կլիմայի փոփոխության ծրագրերի համակարգող Դիանա Հարությունյանն ընդգծեց, որ ՄԱԶԾ Կլիմայի փոփոխության բոլոր ծրագրերը ներառում են հստակ ձևակերպված, կանանց և սոցիալապես խոցելի խմբերին վերաբերող պահանջներ, որոնք բխում են գենդերային հավասարության և սոցիալական ներառվածության ապահովման հիմնարար սկզբունքներից:
«COP26 Կողմերի կոնֆերանսում, ՄԱԿ-ի Կլիմայի փոփոխության շրջանակային կոնվենցիայում, ինչպես նաև հետագա բոլոր որոշումներում կանանց ներգրավվածությունն ու դերակատարությունը մեծապես կարևորվում և ողջունվում է: Կանանց դերը պետք է հաշվի առնվի բոլոր մակարդակներում՝ սկսած քաղաքանություններից, մինչև իրավունքների պաշտպանություն, և դա է լինելու այն առանցքը, որի շուրջ մենք այսօր քննարկումներ ենք ունենալու», - նշեց տիկին Հարությունյանը:
Երկօրյա խորհրդաժողովի ընթացքում ՄԱԶԾ Կլիմայի փոփոխության ծրագրերի փորձագետները ներկայացրեցին Հայաստանում կլիմայի փոփոխության միտումները, առկա խոցելիությունն ու ռիսկերը, իրականացվող ծրագրերը և դրանցում ներառված գենդերային ուղղվածությամբ պահանջները, ինչպես նաև էներգետիկայի, ջրային ռեսուրսների կառավարման, տուրիզմի, առողջապահության ոլորտներում և կլիմայի փոփոխությանը հարմարվողականության գործողությունների պլանավորման գործընթացում առկա գենդերային հիմնախնդիրներն ու դրանց լուծմանն ուղղված հնարավոր միջոցառումները:
Միջոցառմանը ներկա գտնվեց և առցանց մասնակցեց ՀՀ կառավարության, պետական մարմինների, ՄԱԶԾ, հասարակական և միջազգային կազմակերպությունների ավելի քան 50 ներկայացուցիչ:
