Հայ
Դեկտեմբերի 4-ին «Հարմարվողականության ազգային ծրագիր Հայաստանում» (ՀԱԾ) ՄԱԶԾ-ԿԿՀ ծրագրի կողմից իրականացվող իրազեկության արշավի շրջանակում լրագրության ուսանողների համար կազմակերպվել է ուսումնական այց ՝ ներկայացնելու ջրային ռեսուրսների և գյուղատնտեսության ոլորտներում կիրառվող կլիմայի փոփոխության հարմարվողականության մի շարք միջոցառումներ:
Ավելի վաղ ուսանողները մասնակցել են «Կլիմայի փոփոխության հարմարվողականությունը Հայաստանում. լրագրողական հայացք» խորագրով երկօրյա դասընթացին, ծանոթացել Հայաստանում կլիմայի փոփոխության միտումներին, ազդեցություններին, խոցելի ոլորտներում առկա ռիսկերին, հասանելի հարմարվողականության միջոցառումներին և քննարկել հասարակության շրջանում կլիմայի փոփոխության հիմնախնդիրների, ոլորտում առկա ինստիտուցիոնալ փոփոխությունների և հարմարվողականության կարևորության վերաբերյալ իրազեկության բարձրացմանն ուղղված անհրաժեշտ միջոցառումների շրջանակը:
Ուսումնական այցի ընթացքում մասնակիցներն այցելել են Կոտայքի մարզի Զորավան գյուղում տեղակայված վարդերի հիդրոպոնիկ ջերմատուն և Արմավիրի մարզի Փարաքար համայնքում գործող կեղտաջրերի մաքրման կայան: Այցի ընթացքում ՄԱԶԾ փորձագետները, ջերմատան սեփականատեր Շահանե Ղազարյանը և «Ջինջ» ինժեներա-խորհրդատվական ընկերության տնօրեն Էդուարդ Մեսրոպյանը ներկայացրել են ոլորտներում առկա խնդիրները, դրանք հաղթահարելու համար կիրառվող հարմարվողականության միջոցառումները, դրանց առանձնահատկություններն ու առավելությունները:
Այցի ընթացքում մասնակիցներին ուղղորդել են նաև «Էկոնյուզ» կայքի խմբագիր Մարիամ Տաշչյանը և Հանրային հեռուստաընկերության «Հրապարակում» հեռուստածրագրի լրագրող Արմենուհի Մինասյանը, ովքեր ուսանողների հետ կիսվել են կլիմայի փոփոխությանն առնչվող հարցերի լուսաբանման, թեմաների ընտրության և համապարփակ ներկայացման իրենց մասնագիտական փորձով:
