Հոկտեմբերի 19-21-ին Երևանում տեղի ունեցավ տարածաշրջանային գործնական աշխատաժողով թափանցիկության ընդլայնված շրջանակի (ԹԸՇ) ներքո ազգային մակարդակով սահմանված գործողությունների (ԱՍԳ) առաջընթացին հետևելու վերաբերյալ, որն ընդգրկում էր Ասիայի, Արևելյան Եվրոպայի, Արևմտյան Եվրոպայի և Այլ տարածաշրջանների երկրները: Քննարկված թեմաներն էին մեղմման գնահատումը, չափորոշիչների միջոցով ԱՍԳ-ների իրականացման առաջընթացի մշտադիտարկումը, ԱՍԳ-ների իրականացման համար անհրաժեշտ և ստացված աջակցությունը:

Աշխատաժողովը կազմակերպվել էր Փորձագետների խորհրդատվական խմբի  կողմից՝ ԿՓՇԿ  քարտուղարության աջակցությամբ և ՀՀ կառավարության ու ՄԱԶԾ Հայաստանյան գրասենյակի համագործակցությամբ և միտված էր հզորացնել զարգացող երկրների Կողմերի փորձագետների տեխնիկական հմտությունները՝  ամրապնդելով ԱՍԳ-ների իրականացման առաջընթացին հետևելու համար համապատասխան հաշվետվողականության դրույթների ընկալումն ու գործարկումը, ներառյալ՝ չափորոշիչների բացահայտումը:

Ողջույնի խոսքով հանդես եկավ ՀՀ շրջակա միջավայրի նախարար Հակոբ Սիմիդյանը: Նախարարը խոսեց Հայաստանի կլիմայական օրակարգի և երկրի՝ այդ օրակարգին ծառայելու ջանքերի մասին: ՄԱԶԾ Հայաստանյան գրասենյակի մշտական ներկայացուցիչ Նաթիա Նացվլիշվիլին ողջունեց հյուրերին և աշխատաժողովի մասնակիցներին՝ ընդգծելով կլիմայի փոփոխության մարտահրավերներին դիմակայելու համար համատեղ ջանքերի կարևորությունը: Ողջույնի խոսքով հանդես եկան նաև ՀՀ շրջակա միջավայրի նախարարի տեղակալ Գայանե Գաբրիելյանը, փորձագետների խորհրդատվական խմբի անդամ Միքայել Վարդանյանը և Կլիմայի փոփոխության շրջանակային կոնվենցիայի թափանցիկության բաժնի թիմի ղեկավար Թուգբա Իցմելին:

Եռօրյա աշխատաժողովի ընթացքում ներկայացվեցին ԹԸՇ կարգավորումները, ինչպես նաև Երկամյա թափանցիկության զեկույցի  կառուցվածքը և միասնական աղյուսակային ձևաչափեըը՝ ԱՍԳ-ների առաջընթացին հետևելու վերաբերյալ տեղեկատվության զեկուցման համար: Բացի այդ, մասնակիցները կիսվեցին չափումների, հաշվետվողականության և հավաստագրման իրականացմանն աջակցող ինստիտուցիոնալ կարգավորումների ներդրման իրենց փորձով: Տեղի ունեցան նաև թեմատիկ քննարկումներ և խմբային աշխատանքներ:

Աշխատաժողովին մասնակցեցին միջազգային փորձագետներ, ՀՀ կառավարության ներկայացուցիչներ (Շրջակա միջավայրի նախարարություն, Վիճակագրական կոմիտե, Էկոնոմիկայի նախարարություն, Անտառային կոմիտե, Երևանի քաղաքապետարան), ինչպես նաև առցանց մասնակիցներ:

Աշխատաժողովի օրակարգը հասանելի է անգլերենով