Հայ
Նոյեմբերի 28-ին Ա․ Թախտաջյանի անվան Բուսաբանության ինստիտուտ ՊՈԱԿ-ում կայացած աշխատանքային հանդիպման ընթացքում ներկայացվել և շահառուների հետ քննարկվել է «ՀՀ քաղաքային կանաչ տնկարկների բարելավման և օպտիմալացման խնդիրները՝ կապված կլիմայի կանխատեսվող փոփոխությունների հետ» ուղեցույցի նախագիծը: Ուղեցույցը մշակվում է «Հարմարվողականության ազգային ծրագիր՝ Հայաստանում» (ՀԱԾ) ՄԱԶԾ-ԿԿՀ ծրագրի շրջանակում Ա․ Թախտաջյանի անվան Բուսաբանության ինստիտուտ ՊՈԱԿ-ի կողմից և նպատակ ունի նպաստել քաղաքային կանաչ ենթակառուցվածքների կառավարման բարելավմանը և նոր գործելաոճերի կիրառմանը՝ հաշվի առնելով կլիմայի փոփոխության առկա և կանխատեսվող փոփոխությունները:
Կատարված աշխատանքների շրջանակում դիտարկվել է Երևանի, Գյումրու և Վանաձորի կանաչ ենթակառուցվածքների առկա վիճակը, դրանցում օգտագործված ծառաթփային տեսակաշարը և կլիմայի կանխատեսվող փոփոխության դեպքում դրանց հարմարվողականության ու փոփոխության առանձնահատկություններն ու հնարավորությունները: Վերջնականացվելուց հետո ուսումնասիրության արդյունքներն օգտագործվելու են նաև «Հարմարվողականության ազգային ծրագիր՝ Հայաստանում» (ՀԱԾ) ՄԱԶԾ-ԿԿՀ ծրագրի շրջանակում ներկայումս Երևան քաղաքի համար մշակվող հարմարվողականության ծրագրի աշխատանքներում:
Աշխատանքային քննարկմանը մասնակցեց Շրջակա միջավայրի և Տարածքային կառավարման և ենթակառուվածքների նախարարությունների, Երևանի և Գյումրու քաղաքապետարանների, Հայաստանի ազգային ագրարային համալսարանի, Ա․ Թախտաջյանի անվան Բուսաբանության ինստիտուտ ՊՈԱԿ-ի, «Էյ Թի Փի» բարեգործական հիմնադրամի և ՄԱԶԾ 24 ներկայացուցիչ:
