Հայ
Մայիսի 11-ին Լոռու մարզում «Համայնքի կայունության ամրապնդում էներգաարդյունավետության և ցածր ածխածնային զարգացման միջոցով» ՄԱԶԾ-Սիդա ծրագրի շրջանակում տեղի ունեցավ Ալավերդի համայնքի էներգետիկ ոլորտի պատասխանատուների վերապատրաստման դասընթաց։
Հանդիպմանը մասնակցում էին Ալավերդու համայնքապետարանի ներկայացուցիչներ, խոշորացված համայնքի բնակավայրերի վարչական ղեկավարներ, ՀՈԱԿ-ների տնօրեններ, Հայաստանում ՄԱԿ-ի Զարգացման գրասենյակի գրասենյակի ներկայացուցիչներ։
ՄԱԶԾ-Սիդա ծրագրի թիմի ղեկավար Արեգնազան Մարտիրոսյանը ներկայացրեց «Համայնքի կայունության ամրապնդում էներգաարդյունավետության և ցածր ածխածնային զարգացման միջոցով» ՄԱԶԾ-Սիդա ծրագրով նախատեսված գործողությունների հիմնական ուղղությունները և նպատակները։
Ծրագրի շրջանակում Ալավերդի համայնքում նախատեսվում է ներդնել էներգետիկ կառավարման համակարգ։ Համայնքային ենթակայության 64 հասարակական օբյեկտներ էներգետիկ կառավարման նոր համակարգ կունենան, կտեղադրվեն արևային ֆոտովոլտային կայաններ և ջրատաքացուցիչներ, որի արդյունքում ակնկալվում է 30 %-ով կրճատել էներգետիկ ծախսը։
Դասընթացի ժամանակ քննարկվեցին էներգետիկ կառավարումը համակարգող աշխատանքային խմբի ձևավորման, համակարգի ներդրման և իրականացման աշխատանքային ծրագրերի, արդիականացման համար էներգախնայողության առումով նպատակահարմար շենքերի ընտրության չափորոշիչների վերաբերյալ հարցեր։
Ալավերդի համայնքում էներգետիկ կառավարման համակարգի ներդրման և իրականացման ծրագրի, էներգետիկ ոլորտի պատասխանատուների գործառույթների շրջանակի, ինչպես նաև համայնքային բյուջեից ֆինանսավորվող շենքերի և համայնքային ենթահամակարգերում էներգասպառման տվյալների և տեխնիկական գույքագրման ձևաթղթերի (օբյեկտի քարտ) լրացման մասին դասընթացի մասնակիցներին ներկայացրեց ՄԱԶԾ-Սիդա ծրագրի փորձագետ Վահագն Աթայանը։
ՄԱԶԾ-Սիդա ծրագրի փորձագետ Անդրե Օհանյանը ներկայացրեց շենքերի էներգետիկ սպառման հիմնական ուղղություններն ու էներգախնայողության ապահովման միջոցառումները։
Իսկ «Քաղաքապետերի դաշնագիր» նախաձեռնության և անդամակցող համայնքների հիմնական հանձնառությունների, կայուն էներգետիկ զարգացման հեռանկարների, մշակման գործընթացի և ելակետային տվյալների հավաքագրման գործընթացից խոսեց ՄԱԶԾ փորձագետ Արտեմ Խարազյանը։
Հանդիպման ավարտին մասնակիցները քննարկեցին հետագայում համատեղ աշխատանքների կազմակերպման հարցերը։
