Հայ
Հուլիսի 23-ին կայացավ ազգային աշխատաժողով՝ նվիրված Հայաստանի երկարաժամկետ ցածր արտանետումներով զարգացման ռազմավարության մաս կազմող գյուղատնտեսության ոլորտից ջերմոցային գազերի (ՋԳ) արտանետումների կրճատման ներուժի գնահատման արդյունքներին։
Աշխատաժողովի նպատակն էր ներկայացնել «ԵՄ-ն կլիմայի համար» ԵՄ-ՄԱԶԾ տարածաշրջանային ծրագրի շրջանակներում «Ի-Վի Քոնսալթինգ» ՓԲԸ-ի և «Ագրոբիզնեսի հետազոտությունների և կրթության միջազգային կենտրոն» հիմնադրամի (ICARE) կողմից իրականացված «Մեղմման հնարավորությունները և կլիմայական նկատառումների ներառումը գյուղատնտեսությունում» ուսումնասիրությունը և քննարկել դրա հիմնական արդյունքները ոլորտի քաղաքականության մշակման պատասխանատուների և փորձագիտական շրջանակների հետ:
Միջոցառումը համախմբել էր մոտ 54 պետական պաշտոնյաների ՀՀ շրջակա միջավայրի և ՀՀ էկոնոմիկայի նախարարություններից, ՀՀ վիճակագրական և Կադաստրի կոմիտեներից, ներկայացուցիչների ՄԱԿ-ի Զարգացման ծրագրից, ՄԱԿ-ի Պարենի և գյուղատնտեսության կազմակերպությունից, Գերմանիայի միջազգային համագործակցության ընկերությունից, Հայաստանի ազգային ագրարային համալսարանից, Հ. Պետրոսյանի անվան հողագիտության, ագրոքիմիայի և մելիորացիայի գիտական կենտրոնից, Ագրոբիզնեսի և գյուղական զարգացման կենտրոն (CARD) հիմնադրամից, մասնագիտացված կառույցներ ներկայացնող և անհատ փորձագետների:
Ուսումնասիրության շրջանակում դիտարկվել է Հայաստանի գյուղատնտեսության ոլորտը, որը ՋԳ արտանետումների երկրորդ ամենախոշոր ոլորտն է (18․5), որպես մի շարք գործընթացների ուղղակի հետևանք, այդ թվում՝ աղիքային խմորման, գոմաղբի կառավարման, մշակաբույսերի պարարտանյութերի կիրառման և այլն։
Աշխատանքի հեղինակները առանձնահատուկ ուշադրություն գրավեցին ուսումնասիրության արդյունքում մշակված ընդհանուր բնույթի առաջարկությունների և ոլորտային հատուկ միջոցառումներ վրա: Վերջիններս ուղղված են առկա մարտահրավերների հաղթահարմանը, որոնք գյուղատնտեսության ոլորտն ավելի խոցելի են դարձնում կլիմայի փոփոխության նկատմամբ և ստեղծում են լրացուցիչ խոչընդոտներ դրա մեղմման գործողությունների համար:
Այնուհետև մասնակիցների միջև քննարկում ծավալվեց, որը վարեց ՄԱԶԾ Կլիմայի փոփոխության ծրագրերի համակարգող Դիանա Հարությունյանը։ Քննարկմանը վեր հանվեցին առաջարկվող գործողությունների և իրականացման մեխանիզմների հետ կապված որոշակի մտահոգություններն ու դիտարկումները:
Ուսումնասիրության արդյունքները, այդ թվում՝ հաշվի առնելով նաև աշխատաժողովի ընթացքում հնչեցված նկատառումները, կարտահայտվեն երկրի Ցածր արտանետումներով զարգացման ռազմավարությամբ:
