Հայ
Ապրիլի 4-ին Վարշավայում կայացավ ազգային հարմարվողականության ռազմավարություններին և պլաններին նվիրված տարածաշրջանային աշխատաժողով Եվրոպական միության կողմից ֆինանսավորվող «ԵՄ-ն կլիմայի համար» ծրագրի շրջանակներում:
«ԵՄ-ն կլիմայի համար» ծրագրի հարմարվողականության բաղադրիչն աջակցում է հարմարվողականության պլանավորմանը՝ հատուկ ուշադրություն դարձնելով հարմարվողականության ծրագրերի մշակմանը և ընդունմանը ինչպես ազգային, այնպես էլ՝ ոլորտային մակարդակներում: Հիմնական նպատակ ունենալով առաջխաղացնել երկրների ջանքերը ազգային հարմարվողականության ծրագրերի (ՀԱԾ) մշակման և աղետների ռիսկերի նվազեցման և բնական վտանգների կառավարման փոխկապվածության ուղղությամբ՝ աշխատաժողովի նպատակն էր քննարկում ծավալել ՀԱԾ-երի մշակումից մինչև հարմարվողականության գործողությունների անցման վերաբերյալ:
Համախմբելով շուրջ 50 մասնակցի՝ ներկայացուցիչներ ԱլԳ երկրների կառավարություններից, մասնագետներ և փորձագետներ ԵՄ անդամ երկրներից և բնապահպանական հաստատություններից՝ աշխատաժողովը միտված էր աջակցելու քաղաքականություն մշակողներին և տեխնիկական հարցերով պաշտոնյաներին կլիմայի փոփոխության հարմարվողականության քաղաքականության մշակման հարցում՝ ԵՄ տարածքում և տարածքից դուրս հարմարվողականության փորձի և մոտեցումների փոխանակման միջոցով:
Ողջունելով մասնակիցներին՝ Եվրոպական հարևանության քաղաքականության և ընդլայնման բանակցությունների գլխավոր տնօրինությունից (DG NEAR) Նիկոլաս Սենդրովիցը նշեց.
«Հաշվի առնելով, որ ԱլԳ երկրները ավելի լրջորեն են բախվում կլիմայի փոփոխության ազդեցություններին՝ համեմատած այլ տարածաշրջանների հետ, գործելու ժամանակը հիմա է: Քանի որ երկրները շարունակում են Փարիզյան համաձայնագրի ներքո ներկայացնել հարմարվողականության իրենց առաջնահերթությունների իրականացման մասին, ԵՄ-ն հավատարիմ է մնում իր խոստմանը աջակցելու այդ երկրներին կլիմայի փոփոխության անխուսափելի ազդեցություններին դիմակայելու հարցում՝ հարմարվողականության քաղաքականությունների մշակման և իրականացման միջոցով»:
ՄԱԶԾ տարածաշրջանային գրասենյակի Կլիմայի, բնության և էներգետիկայի բաժնի ղեկավար տիկին Լաուրա Ալթինգերը խրախուսեց ԱլԳ երկրների զգալի ջանքերը՝ ուղղված «ԵՄ-ն կլիմայի համար» ծրագրի շրջանակում կլիմայի մեղմման և հարմարվողականության գործողությունների ամրապնդմանը:
«ԵՄ-ն կլիմայի համար» ծրագիրը հպարտությամբ է փաստում, որ աջակցել է ԱլԳ երկրներին իրենց վերանայված ԱՍԳ-ների, ՑԱԶՌ-երի մշակման և ԵՄ քաղաքականությունների հետ նրանց կլիմայի փոփոխության քաղաքականությունների ավելի սերտ ներդաշնակեցման հարցում: Այս աշխատաժողովը արդյունավետ հարթակ կծառայի ԵՄ հաստատությունների և անդամ երկրների փորձի և հաջողված պրակտիկայի փոխանակման համար, քանի որ հարմարվողականությունը առաջնային պլան է մղվում ահագնացող եղանակային արտասովոր դրսևորումների և այդ պայմաններին հարմարվելու աճող կարիքների առկայության համատեքտում»,- նշեց տիկին Ալթինգերը։
Հաջորդիվ ԱլԳ երկրների ներկայացուցիչները զեկուցեցին իրենց հարմարվողականության ռազմավարությունների մշակման և իրականացման ընթացիկ վիճակի մասին՝ հայտնելով աշխատաժողովից իրենց ակնկալիքների մասին:
ՀՀ Շրջակա միջավայրի նախարարության Կլիմայական քաղաքականության վարչության գլխավոր մասնագետ Աննա Մազլումյանը ներկայացրեց Հայաստանի կլիմայական քաղաքականության շրջանակը և օրակարգը՝ կարևորելով ազգային, ենթազգային և ոլորտային մակարդակներում հարմարվողականության գործողությունները, ինչպես նաև՝ ՀԱԾ-ի իրականացումից բխող առանցքային կլիմայական նախաձեռնությունները:
Որպես հարմարվողականության ծրագրերի և երկրների փորձառությունների միջտարածաշրջանային փոխանակման մաս, Հայաստանում ՄԱԶԾ գրասենյակի ՀԱԾ իրականացման և մոնիտորինգի ղեկավար տիկին Նաիրա Ասլանյանը խոսեց ՄԱԶԾ-ԿԿՀ ծրագրի ներքո իրականացված կլիմայական ռիսկերի և խոցելիության գնահատման Հայաստանի փորձի մասին: Մասնավորապես, նա ներկայացրեց հարմարվողականության համատեքստը, ազգային և ոլորտային հարմարվողականության գործողությունների ընթացքը և ՀԱԾ իրականացման իրավական դաշտը: Տիկին Ասլանյանը նաև խոսեց կլիմայական ռիսկերի և խոցելիության գնահատման անցկացման համար կիրառված մեթոդոլոգիաների, գնահատման սոցիալ-տնտեսական չափումների, ինչպես նաև՝ գնահատման ընթացքում գրանցված հիմնական մարտահրավերների ու խոչընդոտների և դրանց լուծմանն ուղղված միջոցառումների մասին:
Հետեվեցին հարմարվողականության հաղորդակցությունների մշակման մոտեցումների, Գլազգո-Շարմ էլ-Շեյխ աշխատանքային ծրագրի, հարմարվողականության պլանավորման հարցում ԵՄ-ի ռազմավարական մոտեցման և միջսահմանային ու անդրսահմանային համագործակցության մեխանիզմների, ԵՄ-ում ազգային հարմարվողականություններից բխող գործողությունների ընթացքի մասին քննարկումները, որոնք ներկայացվեցին ՄԱԿՓՇԿ-ի, Եվրոպական հանձնաժողովի Կլիմայական գործողությունների գլխավոր տնօրինության (DG CLIMA) և Եվրոպայի շրջակա միջավայրի գործակալության ներկայացուցիչների կողմից:
Ի լրումն, զեկույցներ եղան կլիմայական և հարմարվողականության անդրսահմանային ռիսկերի, անդրսահմանային տիրույթում գիտելիքի պակասի և տվյալների բացերի, ինչպես նաև՝ այն լուծումների մասին, որով երկրներն ու տարածաշրջանները հաղթահարում են այդ ռիսկերը՝ հանուն առավել ամուր դիմակայունության ստեղծման:
Աշխատաժողովը նպաստավոր էր մասնակիցների միջև երկխոսության ծավալման տեսանկյունից, որի շնորհիվ վեր հանվեցին այն հիմնական խնդիրներն ու մարտահրավերները, որոնց երկրները բախվում են իրենց հարմարվողականության ծրագրերի մշակման ընթացքում: Այն նաև խթանեց ազգային և ենթազգային մակարդակներում գործողությունների վերաբերյալ գիտելիքի փոխանակմանը, ինչպես նաև՝ զգալիորեն ուղղորդեց հարմարվողականության իրականացման հարցում՝ հիմնվելով մասնակիցների կողմից ներկայացված հիմնական քաղած դասերի ու փորձի վրա:
