Սույն թվականի հոկտեմբերի 15-17-ը Հայաստանի Հանրապետության պատվիրակությունը մասնակցում է Մոլդովայի Քիշնեվ քաղաքում անցկացվող «Ցածր արտանետումներով զարգացման երկարաժամկետ ռազմավարության մշակումը և կլիմայի նպատակաուղղման մեխանիզմները» տարածաշրջանային  աշխատաժողովին, որը կազմակերպվել է «ԵՄ Կլիմայի համար» (EU4Climate) ծրագրի շրջանակներում:

Եվրոպական միությունից ֆինանսավորվող ծրագիրը իրականացվում է ՄԱԿ-ի զարգացման ծրագրի կողմից: Ծրագիրն աջակցում է ԵՄ Արևելյան գործընկերության վեց երկրների՝ Հայաստանի, Ադրբեջանի, Բելառուսի, Վրաստանի, Մոլդովայի Հանրապետության և Ուկրաինայի կառավարություններին՝ կատարելու Փարիզյան համաձայնագրով Կլիմայի փոփոխության ուղղությամբ ստանձնած պարտավորությունները, ինչպես նաև՝ մշակելու և իրականացնելու կլիմային առնչվող քաղաքականություններ, որոնք կնպաստեն ցածր արտանետումներով կլիմայի նկատմամբ դիմակայուն զարգացմանը:

Եռօրյա տարածաշրջանային աշխատաժողովի նպատակն է հիմք դնել  քննարկումների և ոգեշնչել Արևելյան գործընկերության վեց երկրներին հետհայացք նետել ու աստիճանաբար անցում կատարել դեպի ավելի հավակնոտ և երկարաժամկետ պլանավորման:

Աշխատաժողովի թեման կենտրոնանում է EU4Climate ծրագրի երկրորդ և հինգերորդ բաղադրիչների վրա.

ii) Ցածր արտանետումներով զարգացման ռազմավարություն (ՑԱԶՌ) մշակում

Չնայած, որ Ազգային Մակարդակով Նախատեսված Ներդրումն արտացոլում է Փարիզի համաձայնագրի և երկրների զարգացման առաջնահերթությունների համատեքստում կլիմայի փոփոխության ուղղությամբ տարվող գործողությունները, դրանք դեռ բավարար չեն պահելու գլոբալ ջերմաստիճանի բարձրացումը նախարդյունաբերական ժամանահահատվածի նկատմամբ 2⁰C-ից ոչ ավել  (այժմ նպատակ ունենալով 1,5 ⁰C-ից ոչ ավել)` երկարաժամկետ գլոբալ նպատակի իրագործման համար: Հետևաբար, ՑԱԶՌ-ի մշակման նպատակն է ձևավորել երկարաժամկետ տեսլական, որը կառավարություններից կպահանջվի ավելի ամուր հանձնառություն՝ կոչ անելով կիրառել նորարարական և ժամանակակից մոտեցումներ Կլիմայի փոփոխության դեմ պայքարում:

(v) Կլիմայի նպատակաուղղումն այլ ոլորտներում, Փարիզյան համաձայնագրի իրականացմանն ուղղված ինստիտուցիոնալ իրազեկում և ոլորտային ուղեցույցներ

ՑԱԶՌ-ի մշակումը հանգեցնում է EU4Climate ծրագրի հինգերորդ բաղադրիչին ՝ կլիմայի փոփոխության քաղաքականության նպատակաուղղմանը (ինտեգրմանը) տնտեսության բոլոր ճյուղերի զարգացման քաղաքականության, ծրագրերի և պլանավորումների մեջ: Այս միջոցառումը կամրապնդի նաև նախարարությունների ոլորտային կառավարումը ածխածնի ցածր արտանետումներին անցնելու գործընթացում: 

Աշխատաժողովին մասնակցող հայկական պատվիրակության կազմում են՝ ՄԱԶԾ հայաստանյան գրասենյակի Կլիմայի փոփոխության ծրագրերի համակարգող Դիանա Հարությունյանը; EU4Climate-Armenia ծրագրի տնտեսական ազդեցության գծով ազգային փորձագետ Արտակ Բաղդասարյանը, և ներկայացուցիչներ ՀՀ էկոնոմիկայի նախարարության գյուղատնտեսության սեկտորից; Տարածքային կառավարման և ենթակառուցվածքների նախարարության վերականգնվող էներգիայի սեկտորից  և Շրջակա միջավայրի նախարարության կլիմայի փոփոխության և մթնոլորտի պահպանության քաղաքականության սեկտորից:

Արևելյան գործընկերության երկրների պետական գործիչների և ներկայացուցիչների, որոշում կայացնողների և միջազգային փորձագետների հետ միասին ՀՀ պատվիրակության անդամները գաղափարներ կփոխանակեն ՑԱԶՌ-ի ձևավորման ներկայիս դրական փորձի, գործիքակազմի և առավելությունների շուրջ, կքննարկեն այդ ռազմավարությունների կիրարկումը կարճաժամկետ գործողություններում և ոլորտային քաղաքականություններում, որն էլ խթան կհանդիսանա նախապատրաստվելու երկարաժամկետ ռազմավարությունների մշակմանն ու ներկայացմանը:

«ԵՄ կիմայի համար -Հայաստան»-ի Տնտեսական ազդեցության գծով ազգային փորձագետ Արտակ Բաղդասարյանը հանդես եկավ «Հայաստան. Փոխակերպելով մարտահրավերները հնարավորությունների» թեմատիկ զեկույցով՝ անդրադարձ կատարելով երկրի էլեկտրաէներգիայի արտադրության և սպառման համակարգերին, ինչպես նաև՝ էներգետիկ ոլորտում ջերմոցային գազերի արտանետման կանխատեսումներին: Իր ելույթում նա զուգահեռներ անցկացրեց տնտեսական աճի և ածխածնի ծավալների աճի միջև՝ ընդգծելով Հայաստանում ածխածնի արտանետումների նվազեցման միտումները:

ՀՀ տարածքային կառավարման և ենթակառուցվածքների նախարարության վերականգնվող էներգիայի վարչության ավագ մասնագետ Նազիկ Մարգարյանը հանդես եկավ ՀՀ-ում կլիմայի փոփոխության մեղմման ուղղությամբ իրականացվող միջոցառումների մասին զեկույցով: Նա ներկայացրեց էներգետիկ ոլորտի ընդհանուր վիճակը՝ կարևորելով վերականգնվող էներգիայի և էներգաարդյունավետությանն ուղղված քաղաքականության և ռազմավարության մշակումը, ինչպես նաև՝ ածխածնի ցածր արտանետումների խթանման և կլիմայի փոփոխության մեղմման ուղղությամբ անհրաժեշտ գործողությունների ձեռնարկումը:

Լրացուցիչ տեղեկություն աշխատաժողովի մասին՝

• Զեկույցներ եռօրյա աշխատաժողովից

• Մասնակիցների օրակարգ